ऐतिहासिक पृष्ठभुमि:
नारायणी सामुदायिक वन नवलपरासी(ब.सु.पू.) जिल्लाको पूर्वी भागको गैडाकोट नगरपालिका अन्तरगत पर्ने वडा नं. ९ मा पर्दछ । यस वनका उपभोक्ताहरु गैडाकोट नगरपालिका वडा नं. क्रमश ६, ७ र ९ का बासिन्दा हुन । यी बन कुल क्षेत्रफल ४७०.४३ हेक्टर क्षेत्रफलमा फैलिएको छ। परापूर्व कालदेखी यस वनलाई संरक्षण र उपभोग गर्दै आएका स्थानीय वासिन्दाहरुको भनाई अनुसार यस भूभागमा अन्दाजी २०० वर्ष देखी मानिसहरुको बसोबास हुन थालेको अनुमान गरिन्छ। २००७ साल भन्दा अगाडी यस क्षेत्रमा वसोवास गर्ने मूख्य जातीहरुमा कुमाल, दनुवार दराई, माझी, वोटे रहेका थिए। यस क्षेत्रलाई मानव बस्तिको रुपमा विकास गर्नका लागि उक्त जातीहरु तनहुँ जिल्लाबाट आई वस्तिको रुपमा विकास हुन थाले पश्चात अन्य जिल्लाबाट मानिसहरु बसाई सरि आउने क्रम सँगै यस क्षेत्रको घना जंगलको तीव्ररुपमा विनाश हुन थाल्यो । मानव वस्ति विस्तारको साथै चितवन जिल्लाको बजार विस्तार हुँदै गर्दा त्यहाँ आवश्यक काठ र दाउराको आपुर्ति अवैधानिक तरिकाले यसै वन क्षेत्रवाट भएकोमा ठूला ठूला रुखहरुले भरिएको जंगल राता नांगा डाँडामा परिणत हुन थाले। अनियन्त्रित चरिचरण, खोरीया फडानी र आगलागिले समेत वन क्षेत्र पूर्णरुपमै सखाप हुदै जान थाल्यो । वन्यजन्तु र चराचुरुङ्गीहरु वासस्थानको खोजीमा अन्यन्त्र जान थाले। एवम् रीतले वने विनाश कार्य दिन प्रतिदिन बढ्दै गयो र वन उजाड र नांगो हुँदै गयो । यसरी वन विनाश हुदै गईरहने क्रममा विशेष गरेर २०३६ साल देखी २०४७ साल सम्म व्यापक रुपमा वन अतिक्रमण र अवैधानिक फंडानी भईरहेको अवस्थामा यहाँका स्थानीय, बुद्धिजीवि, भद्र भलाद्मी, सरोकारवाला सम्वन्धित निकायको पहलमा वातावरणीय असन्तुलन आउन सक्ने ठाँनी बनको संरक्षण कार्य प्रारम्भ भएको थियो। यसै क्रममा तत्कालिन गैडाकोट गा.वि.स.को गठन पश्चात वन जंगल विनाशलाई रोक्नको लागि भईरहेका विभिन्न पहल अन्तर्गत २०४९ भाद्र १५ गते गा.वि.स.को पहलमा स्थानीय राजनीतिक पार्टिका तथा विभिन्न संघ संस्थाका प्रतिनिधि रहने गरि गा.वि.स. स्तरीय वन संरक्षण समिति गठन गरि सो अनुरुप वन ऐन २०४९ र नियमावली २०५१ वमोजिम २०५३ मा जिल्ला वन कार्यालय वाट विधिवत रुपमा नन्दन सामुदायिक वनको विधान दर्ता भयो । नन्दन सामुदायिक वनको १५औ साधारण सभाले वन लाई संरक्षण, सम्वर्धन र सदुपयोग गर्न असजिलो भएको र उपभोक्ताहरुलाई घरपायक पर्ने गरी वन पैदावार निकाल्न असिजिलो भएकाले साधारण सभाले नै समुह विभाजनको निर्णय गर्यो। सोही अनुरुप नन्दन सामुदायिक वनबाट छट्टिएर नारायणी सामुदायिक वन भएको हो ।